Færslur: 2005 Desember

31.12.2005 00:52

Gestir og hestagestir

Éta mat éta maaaaat Étaaaaa lon og don sagði hann svangi Mangi Langi Mangi Svanga Mangason.Kannist þið við lagið folks.Svona er maður búinn að vera undan farna daga en nóg um það því að Sigrún og Gert komu til okkar með litluna sína og gistu.Litlan bara borðaði og borðai og svaf og svaf.Svona eiga lítil kríli að vera.Sigrún komst í svakalegan ham þegar að hún komst niður í hesthús til mín.I LOVE IT hljómaði um hesthúsið á meðna hún ruddist í gegnum skítinn í flórnum einsog Bobcat.Fæturnir tifuðu undir henni í gegnum skítinn dauðfegnir að komast af malbikinu í Kópavoginum.Þetta var nú öllu mýkra og betra.Næst skelltum við okkur í Kanínuhúsið og stóra hesthúsið.Settum við hálm undir Hrókinn og folöldin og gáfum vel.Svo æddum við inná Mánagrund að taka út nýju innréttingarnar hennar Guddu(ekki bóstaflega sko þó mig langi í þær).Mikið agalega fer vel um hrossin hjá henni og innréttingarnar fínar og flottar.Innilega til hamingju með þetta Gudda mín.Fengum við æðislega gott kaffi hjá Guddu minni,Já" ég sagði æðislega gott kaffi!Henni fer fram stúlkunni.

Í gær kom Biggi með fjóra hesta í smá jólafrí til mín.Það voru Hávaði og þessi svarti fallegi og fölrauð meri og ein enn hjálp"ég man ekki hver það var en það var meri.Shittur ég er farin að kalka.Svo kom hún Hel Hróksdóttir hingað til vetrardvalar.Alltaf er hún falleg sú meri og gaman að fá hana hingað til "ömmu"í vetur.Við gáfum hrossunum einar 10 rúllur út til að þau hafi nú eitthvað að maula við ef að vindáttin stendur á Ásgarðinn og sprenginarnar heyrast úr Garðinum eða Sandgerði.Reyndar tek ég inn graðtittina og geldingana svo að það verði minni hætta á að þeir fari sér að voða vegna sprenginna og hávaða.Merarnar eru vanalega rólegri og líka þyngri á sér vegna óléttu.Svo eru gömlurnar mínar hér í Ásgarðinum vanar hvellum og látum þegar að maður minn tekur sig til og fer á veiðar niður í fjöru.Þá eru þær vanar að koma hlaupandi til hans til að vita hvaða asskotans læti þetta séu í honum.Þannig að ég er ekki hrædd um að þær fari sér að voða.

Í dag kom hún Sýn frá Feti og verður hún hér í vetrarpössun.Sú hefur nú stækkað í sumar og er að verða hið myndarlegasta trippi.gama þegar að sömu hrossin birtast aftur að ári,þá veit maður að fólk er ánægt með atlætið hér á bæ.Já"og ég er búin að skila inn öllum stóðhestaskýrslunum í ár! Núna náði ég inná Pósthúsið tveimur mínútum fyrir lokun! Mér fer fram því að í fyrra var nánast lokað á mig.Hvernig stendur á því að maður gerir þetta ár eftir ár að vera með skýrslurnar á síðustu stundu?Ég sem að var búin að lofa mér því að vera tímanlega í ár með þær.Það verður bara áramótaheitið mitt í ár að vera búin að þessu tímalega fyrir næstu áramót!

 

Tengill á færslu

Bæta við áliti

Sýna álit (2)

25.12.2005 23:26

Yndislegur tími

Mikið agalega small allt saman hjá mér fyrir jólin.Svona er að vera vel skipulögð(ekki mín stærsta hlið hingað til)en núna varð þetta allt saman svo auðvelt viðureignar.Reyndar brá okkur hjónunum svolítið daginn fyrir Þorláksmessu en þá þurfti bílinn okkar endilega að bila.Stýristöng datt úr sambandi en svo vel vildi til að það skeði hér heima á mjög lítilli ferð.Vorum við að enda við að gefa öndunum brauðið sitt og svo var ætlunin að skella sér í bæinn í fimtugsafmælið hans Magga mágs hennar Lillu systur.Sem betur fer þá fór stýristöngin úr sambandi þá en ekki á Reykjanesbrautinni á fullri ferð!En við fengum far með Önnu systir og Kidda mág.Skemmtum við okkur öll mjög vel og var mikið sungið og hlegið.Ég hafði ekki undan að mála á mig nýtt andlit því að það lak stöðugt af mér í hláturrokunum.

Á Þorláksmessunni þá gerði Hebbi við bílinn og brunuðum við fyrst í Bónus í Njarðvík og versluðum allann matinn fyrir hátíðirnar og svo skelltum við okkur í bæinn að kaupa jólagjafirnar og deila þeim út.Því lauk á slaginu tólf og þá var eftir að fá sér Skötuna en Hebbi afþakkaði kurteislega og fékk soðinn Þorsk.Eftir að ég hámaði í mig Skötuna þá var næst að gefa dýrunum að borða matinn sinn en því lauk klukkan fjögur um nóttina.Það gerði svosem ekki mikið til því að gjöfin á undan var vel ríflega og enginn orðinn sársvangur nema við Hebbi.Skreið ég þreytt og sæl uppí rúm klukkan fimm og sofnaði vært.Segi ekki hvenær ég vaknaði næsta dag hehehe!

Tengill á færslu

Bæta við áliti

Sýna álit (0)

21.12.2005 19:11

Best að fara að byrja!

Góðan daginn allir saman.Er ekki best að fara að skella sér í jólagírinn og fara að gera eitthvað.Ég er vön að taka þetta með trompi á tveimur dögum,annar fer í að versla og hinn í að versla því sem ég gleymdi að versla og keyra út gjöfunum.Reyndar er kallinn minn búinn að setja upp seríur og ljós í gluggana því hvað er jólalegra en ljósin í öllum regnboganslitum.Annars vantar allan dúnþykka jólasnjóinn en hann finnst mér alveg ómissandi.En þessir veðurfræðingar nú til dags eru alveg handónýtir við þetta og ekkert hægt að múta þeim.

Ég varð alveg hlessa um daginn þegar að ég fékk rukkun um að ég hefði farið í gegnum Hvalfjarðargöngin án þess að greiða fyrir það! Það var alveg sama hvað ég lagði hausinn í bleyti ekki gat ég með nokkru móti munað eftir þessu atviki.Hebbi minn hringdi í þá og jú viti menn það var til mynd af bílnum fara í gegnum áskriftarhliðið og mynd af ökumanninum.Var bílnum stolið eða hvað? En svo kveiknaði ljós í litla kollinum mínum! Þetta hafði skeð þegar að við Sabine fórum á Fjórðungsmótið á Kaldármela og þegar að við komum til baka þá var algjörlega stíflað ofaní göngin og löng bílalest beið.Málið var að þeir sendu einn út til að rukka handvirkt þá sem að voru með miða eða pening og var okkur hleypt í gegnum áskriftarhliðið! Þar tók myndavélin myndir af öllum þeim sem höfðu verið "handrukkaðir"og svo var þeim send rukkun! Sem betur fer þá mundi ég þetta því að það voru ansi margir sem að fengu rukkun á þannan dag og málið orðið ansi flókið.Skrítið að senda manni rukkun fleiri mánuðum síðar!

 

Tengill á færslu

Bæta við áliti

Sýna álit (0)

19.12.2005 23:10

Allar kistur að fyllast

Ég held að við séum að verða búin að fylla allar kistur af mat fyrir Jólin og veturinn.Flestar dýrategundirnar á bænum að verða að dýrindis kræsingum.Ussssss.......svona á maður ekki að setja á prent en svona er að vera bóndi.Og svona er lífið sagði einhver.

Það er búinn að vera gestagangur hér á bæ en þó í litlum mæli miðað við venjulega.Í gær kom fólk að kíkja á hest sem kom hingað í smá fitun og er mér að takast að fita klárinn og fólkið var ánægt með gripinn.Þá er ég líka ánægð.Það er nefinlega svo merkilegt hvað sum hross og sumt fólk getur verið grannt en étið og étið á meðan ég ......uhuhuhuh grát grát má ekki opna ískápinn án þess að bæta á mig kílói! Kannist þið við þetta?

Í dag fékk útigangurinn rúllurnar sínar og brauð í ofanálag.Silfri var svo glaður að fá brauðið að hann beit mig í einn puttann! Næst hendi ég brauðinu til hans! Það rigndi alveg látlaust á mig og varð ég holdvot eftir gjöfina.Ég sem hélt að það væri nóg að sitja inní heitum traktornum og stýra á meðan hliðin opnuðust og rúllurnar klæddu sig úr plastinu og garninu! skritið hvað tækninni fleygir hægt fram!

Biggi og ung dama komu í dag með fjögur hross úr Reiðskólanum og eru það að koma til að slappa af yfir jólin.Mikið voru hryssurnar lukkulegar þegar að þær komust niður á vinkil í rúllurnar með hinum merunum.Annars vissu þær ekki hvort að þær ættu að bíta gras eða borða rúllu eða bara skvetta úr hófunum! Gaman að þessum greyjum.

Tengill á færslu

Bæta við áliti

Sýna álit (0)

18.12.2005 15:03

Hvernig líst ykkur á!

Jæja gott fólk,vinir og vandamenn.Hér er lausnin á vanda mínum komin.Fann á netrölti mínu snilldarlausn fyrir mig varðandi blogg og heimasíðugerð og allt á íslensku!Hér getur maður prófað sig áfram í einn mánuð frítt og ef manni líkar kerfið þá kostar þetta ekki nema rúmar 2000 krónur á ári!

Nú er um að gera að fikta nógu mikið og prufa sig áfram.Ekkert annað að gera þegar að kuldaboli lemur rúðurnar með fyrsta snjóbyl hér í Ásgarðinum í vetur.Ég fer ekki fet út fyrren þessu slotar og hananú!

©2019 by Sjálfsþurftar búskapur. Proudly created with Wix.com